Rritja e pirjes së duhanit nga gratë shpie kah rritja e patologjive të kancerit të mushkërive (rritje për +5,5% gjatë viteve 1975-1993).

Me sa duket pirja e duhanit e zvogëlon pjellshmërinë. Një studim i gjerë ka treguar që 5% të grave që nuk e konsumojnë duhanin nuk kanë mundur të mbeten shtatzëna në 5 vjet pas ndërprerjes së kontraceptivëve, derisa kjo përqindje rritet në 11% në rastin e atyre që e konsumojnë shpesh duhanin. Gratë duhanpirëse janë dyfish më të rrezikuara nga shtatzënitë jashtë mitrës në krahasim me ato që nuk e konsumojnë duhanin. Duhanpirëset janë gjithashtu më të rrezikuara nga disomenorea (çrregullimet menstruale) dhe kanceri i qafës së mitrës; osteoporoza është më e hershme, siç është edhe menopauza, që paraqitet 2 vite më herët se normalisht. Edhe fetusi i nënshtrohet disa rreziqeve të rëndësishme, kurse aborti spontan është më i shpeshtë. Monoksidi i karbonit dhe nikotina shkaktojnë rritje të frekuencës së rrahjeve të zemrës dhe lindje të parakohshme. Ekziston gjithashtu një rritje në vdekjet para lindjes, në rastin e foshnjave me hipertrofi dhe që peshojnë më pak se 200 gram. Duhanpirëset që i ushqejnë foshnjat me gji, e përcjellin nikotinën te foshnjat e tyre. Fëmijët e prindërve duhanpirës janë në rrezik të bronkitit, bronko-pneumonisë dhe otitit përmes konsumimit pasiv të duhanit. Ky rrezik është i dyfishtë në vitin e parë të jetës. E njëjta vlen edhe për paraqitjen e sulmeve të astmës, që janë shumë më të rënda. Gratë që e konsumojnë duhanin dhe marrin kontraceptivë oralë janë më të rrezikuara nga sulmet e zemrës, pika, flebo-tromboza dhe embolizmet, veçanërisht në moshën mbi 40 vjeçe. Sa i përket lëkurës, shenjat e plakjes së parakohshme janë evidente për shkak të distrofisë, humbjes së elasticitetit dhe diskromisë. Përveç nikotinës në tymin e duhanit gjenden elemente radikale oksiduese, të cilat i thithim me më shumë se 4000 substanca kimike, që lirohen si rezultat i ndezjes së cigares.

Stephen Hecht, studiues në Qendrën e Kancerit të Universitetit të Minesotës, e ka dëshmuar praninë e NNK-së (nitrosaminë 4-(metilnitrosaminës)-1-(3-piridil)-1-butanon). P.sh. një nga agjentët më kancerogjen që ndodhen në tymin e cigares gjendet në urinën e parë të foshnjave të porsalindura të nënave që kanë pirë duhan gjatë shtatzënisë.