Në vitin 1986 WHO deklaroi se përdorimi i duhanit në çfarëdo forme nuk është në përputhje me arritjen e objektivave të shëndetësisë dhe se nikotina shkakton varësi: "cigarja është mjet vdekjeje dhe nuk mund të kemi qëndrim neutral ndaj saj".

Rreth 90% të duhanpirësve janë të njoftuar me pasojat vdekjeprurëse të pirjes së duhanit; të tjerët e shohin konsumimin e cigares si faktor rreziku shëndetësor; derisa të mbeturit e minimizojnë atë nga frika e mungesës së kënaqësisë. Shumë prej tyre i injorojnë rreziqet e vërteta të pirjes së duhanit, pasi që rreziqet e vërteta janë shpesh të kamufluara nga të vërtetat e rreme – kinse shkenca ende nuk i ka vërtetuar rreziqet e vërteta nga pirja e duhanit. Kjo nuk është e vërtetë, pasi që statistikat tregojnë që shumë më shumë njerëz vdesin nga pirja e duhanit sesa nga aksidentet rrugore, konsumimi i heroinës, SIDA, vrasjet dhe vetëvrasjet.

Pasojat e pirjes së duhanit janë nënçmuar deri në vitet 1990, por pas studimeve të shumta në këtë fushë, mund të themi se pirja e duhanit paraqet rrezikun më të madh për jetën tonë dhe vret më shumë njerëz sesa çdo sëmundje tjetër. 50% të duhanpirësve vdesin si pasojë e dëmtimeve të shkaktuara nga shprehia e pirjes së duhanit, një çerek në mes moshës 35 dhe 65 vjeçe, kurse një çerek tjetër në vitet vijuese.

Mijëra vdekje për shkak të kancerit kanë të bëjnë me pirjen e duhanit. Në të vërtetë, vartësit e duhanit kanë një shkallë 20 herë më të madhe të paraqitjes së kancerit sesa ata që nuk pinë duhan, kurse 90% e të gjitha patologjive të kancerit në mushkëri paraqiten te duhanpirësit. Gjasat e paraqitjes së këtyre patologjive rriten në 10-15 herë kur konsumohen 20 cigare në ditë dhe 5 herë në rast të konsumimit të 10 cigareve në ditë. Me fjalë të tjera, sa më shumë që konsumoni, aq më shumë rrezikoni. Kohëve të fundit është shënuar një rritje e kancerit të: zgavrës orale, fshikëzës, stomakut dhe zorrës së trashë. Pirja e duhanit shkakton një nga tri vdekje për shkak të patologjive kardiake, për shkak të pasojave në enët koronare. Në të vërtetë, vlerësimet konfirmojnë që pirja e duhanit shkakton 60% të sëmundjeve fatale të zemrës.

Është e sigurt që pirja e duhanit e zvogëlon jetën për 8,3 vite, sipas disa studimeve, derisa të tjerët e përmendin shkurtimin prej 12 viteve, por të gjithë pajtohen që duhanpirësit vdesin para kohe, duke e sakrifikuar një pjesë të mirë të jetës së tyre për shkak të kënaqësisë së pirjes së duhanit.

Një nga pasojat e para dëmtuese të pirjes së duhanit paraqiten brenda 10 minutave të parë të konsumimit, duke ndikuar në shtypjen e gjakut, që rritet për 30 mmHg. Pirja e duhanit konsiderohet faktor rreziku te arterioskleroza, patologji kjo e shkaktuar nga ngushtimi i arterieve dhe në rastet e pirjes së rëndë të duhanit bart pasoja për trupin si: patologji të enëve koronare, angina pectoris, infarkt dhe dështim të zemrës për shkak të qarkullimit të pamjaftueshëm, dobësim të zemrës, ngushtim të arterieve veshkore me hipertension dhe pamjaftueshmëri veshkore, ngushtim të enëve në këmbë dhe të atyre që e çojnë gjakun në tru, pasuar me probleme dëgjimi, marramendje, pikë dhe hemi-paralizë.

Pirja e duhanit favorizon kalcifikimin e enëve të gjakut. Për këtë arsye, duhanpirësit shumë shpesh lëngojnë nga probleme me qarkullimin e gjakut në këmbët e tyre, duke e krijuar kështu një gjendje e quajtur "këmbët e duhanpirësit". Kjo patologji ka të bëjë me ngushtimin dhe bllokimi i arterieve të këmbëve, që shkaktojnë dhimbje në këmbë gjatë ecjes, pasi që muskujt kanë nevojë për më shumë oksigjen gjatë këtij aktiviteti, por që nuk mund ta marrin atë për shkak të kapacitetit të zvogëluar të enëve të gjakut. Dhimbja paraqitet papritmas gjatë ecjes, gjë që tregon një mungesë të oksigjenit. Si rezultat, personi në fjalë detyrohet të ndalojë për disa minuta, derisa nuk zvogëlohet ndjenja e dhimbjes.

Pirja e duhanit nuk e dëmton një organ të vetëm, por dëmton një mori sistemesh të rëndësishme të trupit tonë dhe kështu ndikon dëmshëm në funksionimin e tyre, duke hapur rrugë për shumë patologji. Personi i varur nga duhani shumë shpesh lëngon nga ulcerë të stomakut dhe të zorrëve, pasi që pirja e duhanit e pengon prodhimin e acideve gastrike dhe e frenon shërimin e ulcerave, derisa e pengon trajtimin e suksesshëm mjekësor. Substancat kancerogjene që i përmban tymi i duhanit eliminohen përmes veshkave dhe fshikëzës, gjë që shkakton një shkallë të lartë kanceri të këtyre organeve te duhanpirësit, sidomos në fshikëz, sipas të gjitha gjasave për shkak të mbajtjes së zgjatur të urinës.

Trakti respirator është i pari që ballafaqohet dhe ndikohet nga tymi i duhanit, veçanërisht hunda, faringu, trakeja dhe bronket. Funksioni i këtyre organeve është të bartet ajri në mushkëri dhe të lejohet shkëmbimi i gazit me gjakun. Dëmtimi më i madh i shkaktohet strukturave të mushkërive, p.sh. alveolave që marrin pjesë në procesin e shkëmbimit të gazit, gjë që ndërhyn në aktivitetin e frymëmarrjes dhe çon drejt një gjendjeje serioze patologjike.

Dëmtimet e tjera që kanë të bëjnë me pirjen e duhanit janë impotenca te meshkujt. Sipas një hulumtimi në Amerikë, impotenca është 50% më e shpeshtë te duhanpirësit sesa të ata që nuk e konsumojnë fare. Numri i lartë i problemeve seksuale mund të jetë i lidhur me problemet e qarkullimit të gjakut si rezultat i pirjes së duhanit.

Edhe eshtrat ndikohen nga varësia e duhanit, duke e ditur që duhanpirësit shpesh lëngojnë nga dhimbjet e shpinës, për shkak të pasojave që nikotina ka në qarkullimin e gjakut. Disqet në mes unazave kurrizore nuk pranojnë gjak apo ushqim të mjaftueshëm, kështu që ato degjenerohen dhe dalëngadalë hollohen.

Goja e duhanpirësit shpesh ndikohet nga gingiviti, që gradualisht depërton në indet më të thella periodontale, gjë që shkakton inflamacion, i cili mund të çojë deri te humbja e dhëmbëve në një afat më të gjatë. Tanimë është e sigurt se varietetet e kancerit që e sulmojnë zgavrën e gojës favorizohen nga këto metoda të konsumimit të duhanit dhe se rreziku i kontraktimit të këtyre sëmundjeve është më i madh aty ku duhani bie në kontakt të drejtpërdrejtë me indet trupore.

Tymi i cigares, veçanërisht nëse konsumohet bashkërisht me alkoolin, është një faktor relevant rreziku në botën perëndimore sa i përket kancerit të ezofagut, që gjithashtu e rrit rrezikun e paraqitjes së adenomave të zorrës së trashë dhe tumoreve të mëlçisë. Nikotina i kontrakton venat, derisa alkooli i hollon ato. Të konsumojmë duhan dhe alkool në të njëjtën kohë është e njëjtë sikur ta pickonim veten për stimulim dhe në të njëjtën kohë ta goditnim veten me shkop në kokë, në mënyrë që ta neutralizonim të njëjtin stimul.

Duhanpirësit shpesh pyesin nëse pirja e duhanit mund të shkaktojë dëmtim të trurit apo humbje të flokut. Ekspertët gjithmonë përgjigjen me "PO", pasi që tymi i duhanit është helm dhe prodhon një sasi të madhe të radikalëve të lirë. Një studim i udhëhequr nga Shkolla e Shëndetit Publik të Harvardit tregon që pirja e duhanit i rrit të gjitha hormonet kryesore, siç janë: hormonet androgjenë, përfshirë këtu DHEA, androstenedioni, testosteroni dhe dy-hidro-testosteroni (DHT), p.sh. hormoni përgjegjës për rënien e flokëve te meshkujt.

Studimi ka studiuar 1241 meshkuj të moshës mesatare dhe ka krahasuar nivelet e hormoneve në mes duhanpirësve dhe atyre që nuk e konsumojnë duhanin fare. Në studim mund të shihet se DHEA është 18% më e lartë te duhanpirësit dhe se DHEAS është 13% më e lartë, androstenedioni 33%, testosteroni 9% dhe DHT 13%. Dihet mirë që niveli më i lartë i testosteronit dhe DHT-së asocohet me nivel të lartë të rënies së flokëve.

Pirja e duhanit nuk do të shkaktojë rënie të flokëve tek ata që nuk janë të predispozuar gjenetikisht për këtë dukuri, por ndërprerja e pirjes së duhanit do ta parandalojë rënien e flokëve tek ata që janë të predispozuar për rënie. Në mes tjerash, pirja e duhanit mund ta keqësojë rënien e flokëve tek ata që veç është evidente.