Melanoma (tumori i lëkurës) nuk është i vetmi dëm që i shkaktohet lëkurës nga cigarja. Duhanpirësit e rëndë janë të ekspozuar edhe ndaj rreziqeve të tjera serioze sa i përket lëkurës.

Lidhja në mes pirjes së duhanit dhe lëkurës është vendosur që nga viti 1856.

Fakti që pirja e duhanit është shkaku që qëndron prapa plakjes së parakohshme të fytyrës vjen nga Ippen e Ippen, që në vitin 1965 kanë qenë të parët që kanë identifikuar ndryshimet në fytyrat e 79% të duhanpirëseve femra në krahasim me 19% të femrave që nuk e pinë atë fare. Në këtë mënyrë ata e krijuan termin "fytyra e duhanpirësit".

Në vitin 1969, studimi i verbër i dyfishtë i Dr. Harry Daniell dëshmoi që duhanpirësit në mes të moshave 40-49 vjeçe e kanë intensitetin e njëjtë të rrudhave me ata që nuk e konsumojnë duhanin, por që janë njëzet vjeç më të moshuar.

Gjithashtu thuhet që ekspozimi i fytyrës ndaj diellit do t'i shkaktonte më pak dëm lëkurës së fytyrës në krahasim me dëmin që e shkakton pirja e duhanit. Analiza e tyre është shumë e përpiktë sa i përket fytyrës së duhanpirësit, p.sh. paraqitja tipike e duhanpirësit karakterizohet me rrudha të dukshme, linja radiale përreth buzëve dhe qosheve të syve, dukje më e theksuar e kornizës eshtërore dhe në disa raste edhe faqe të lëshuara.

Fenske dhe Smith e kanë përmendur edhe një transformim të dukshëm të shkaktuar nga pirja e duhanit në artikullin e tyre, p.sh. humbjen e ngjyrës së thonjve në gishtërinjtë që përdoren për ta mbajtur cigaren, gjë që është aq e dukshme sa që në rast të ndërprerjes së menjëhershme të pirjes krijohet një vijë e qartë demarkacioni në thonjtë e zverdhur.

Nëse 4.000 komponentët toksikë të duhanit absorbohen në sistemin tonë, ato mund të shkaktojnë dëmtimin e indit epidermal dhe shkaktojnë modifikime vaskulare.

Për fund, absorbimi i tymit të duhanit shkakton ndryshim të fijeve elastike në pjesën më të thellë të lëkurës. Ky ndryshim është definitivisht më i madh sesa ndryshimet që shkaktohen nga elastoza e diellit.

Dëm tjetër që lidhet ekskluzivisht me duhanpirësit është edhe ajo që amerikanët i referohen si Gojë Hendeku, që është një formë gingiviti ulcerizues e nekrotizues (ANUG), që përfshin ulcerizimin, dhimbjen dhe kundërmimin e frymës.