Gjatë pirjes së duhanit shumica e nikotinës ikën në ajër, derisa një e pesta futet në mushkëri. Pirja e llullës prodhon pak më shumë nikotinë se sa pirja e puros. Sa më i fortë është zjarri i sipërfaqes që digjet, aq më shumë nikotinë futet në sistem. Për këtë arsye, sa më shpejtë që pi duhan, aq më shumë nikotinë fut brenda – sa më shumë që zvogëlohet gjatësia e cigares, aq më shumë nikotinë keni futur brenda.

Nikotina e pastër është helm shumë i fuqishëm. Një pikë e nikotinës në lëkurën e lepurit shkakton shok të menjëhershëm. Nëse e konsumoni një pako me 20 cigare çdo ditë, atëherë ju i futni brenda në organizëm rreth 400 mg nikotinë në javë. Po ta kishit marrë këtë sasi në një çast, do t'ju vriste sikur një goditje me revole.

Në traktin respirator ekzistojnë substanca të ndryshme që e dëmtojnë shëndetin, substanca ngacmuese, siç janë acidi hidrocianik, akroleini, formaldehida dhe amoniaku. Sistemi jonë i frymëmarrjes e ka një "sistem pastrimi" të përbërë nga shumë qeliza që shërbejnë si barrierë nga pluhuri, mikrobet dhe substancat toksike, barrierë kjo që hyn në përdorim gjatë marrjes së frymës. Mirëpo, substancat ngacmuese, të cila i përmban tymi i duhanit mund ta dëmtojnë shumë lehtë këtë "sistem pastrimi" dhe kështu ta lehtësojnë hyrjen e substancave të dëmshme në mushkëri. Duke e pirë duhanin, ju jo që jeni duke i dëmtuar mushkëritë, por jeni duke e rritur ekspozimin tuaj ndaj smogut dhe agjentëve të tjerë ndotës, që nuk mund të bllokohen më nga sistemi i pastrimit.

Kollitja dhe sekreti tipik i duhanpirësit është shenjë e mungesës së efikasitetit të sistemit pastrues së mushkërive, që shkakton sasi të tepërta të sekretit (mukozës), bronkit kronik dhe emfizemë. Shumë prej substancave të depozituara brenda mushkërive e rrisin rrezikun nga kanceri i mushkërive, që në 85-90% të rasteve shkaktohet nga tymi i duhanit. Pirja e duhanit shkakton edhe lloje të tjera të kancerit përgjatë traktit respirator, sidomos në zgavrën orale, në faring dhe laring, sistemin qarkullues dhe zemër.

Substancat që e dëmtojnë sistemin e qarkullimit të gjakut janë DYOKSIDI I KARBONIT dhe NIKOTINA. Dyoksidi i karbonit e zvogëlon sasinë e oksigjenit për tërë sistemin: zemrën, trurin, muskujt etj. Bashkë me nikotinën, dyoksidi i karbonit e përshpejton krijimin e copëzave të arteriosklerozës në enët e gjakut, duke e rritur kështu edhe rrezikun e miokardiumit, infarktit dhe pikës.

Ka edhe dëmtime të tjera, siç janë: rreziku që përveç mushkërive dhe traktit respirator kanceri të dëmtojë një numër organesh tjera si fshikëzën, ezofagun, veshkat, pankreasin, qafën dhe trupin e mitrës; humbja e flokëve; frymëmarrja e keqe; njolla në lëkurë dhe dhëmbë; dëmtime të lëkurës etj.

Pirja e duhanit zvogëlon dukshëm performansën atletike. Sot, asnjë atlet profesionist nuk është duhanpirës.