Shumica e njerëzve janë të vetëdijshëm për rreziqet për shëndetin që sjell pirja e duhanit dhe që tymi i duhanit është burim i kancerit të mushkërive, si dhe shumë sëmundjesh të tjera serioze.

Për më shumë, çdo duhanpirës e di sa vartës mund të jetë duhani si drogë dhe sa e vështirë është të ndahemi me këtë shoqërues jetësor nëse mbështetemi vetëm në fuqinë e vullnetit. Për këtë arsye, duhanpirësit kanë nevojë për ndihmë në ndërprerjen e pirjes së duhanit.

Pirja e duhanit ndikon në të gjitha klasat shoqërore dhe moshat, por që është edhe më alarmuese: ajo ndikon në rininë tonë.

Për shkak të dëmtimit të shëndetit dhe përkujdesjes së mëtejme spitalore, pirja e duhanit ka si rezultat harxhime marramendëse mjekësore përreth globit. Statistikat konfirmojnë që pirja e duhanit dhe sëmundjet e lidhura me të paraqesin shkaktarin kryesor të vdekjes në vendet e industrializuara.

VARËSIA

Viteve të fundit duhani është shpallur zyrtarisht drogë në të gjitha aspektet e saj. Studiuesit nga radhët e industrisë së duhanit kanë pasur të dhëna me dekada të tëra mbi natyrën e tij tmerrësisht vartëse. Në një krahasim të paradokohshëm në mes atributeve të disa drogave kryesore si: heroina, kokaina dhe alkooli, është konstatuar që nikotina e ka fuqinë më të madhe varëse. Varësia e shkaktuar nga një substancë e caktuar përcaktohet duke e shikuar: vështirësinë me të cilën një person ballafaqohet kur dëshiron ta ndërpresë konsumimin; frekuencën e kthimit; përqindjen e personave me varësi dhe "vlerën" që e ka për konsumuesit, pa marrë parasysh dëshmitë mbi dëmtimin e shëndetit.

Krahas varësisë farmakologjike, varësia psikologjike nga nikotina luan rol vendosës në krijimin e lidhjes në mes duhanpirësit dhe cigares. Nxitësit janë në shumicën e rasteve të lidhur me: faktorë shoqërorë e kulturorë; gjeste që asocohen me veprimin e pirjes së duhanit dhe efekte të ngjashme me ato të amfetaminës. Këto efekte nxisin pritje për sukses më të madh në ballafaqim me presionet shoqërore apo presionet në punë.

Varësia farmakologjike dhe psikologjike bashkekzistojnë brenda të njëjtit person dhe atë në lloj-lloj personash të ndryshëm në proporcione të ndryshme. Për këtë arsye, pirja e duhanit shkakton varësi dhe i detyron duhanpirësit të bëhen skllevër të shprehisë si në nivel fizik po ashtu edhe në atë psikologjik.

Nga 1000 meshkuj duhanpirës të rritur:
- 1 do të vdesë në rrethana të dhunshme
- 6 do të vdesin në aksidente rrugore
- 250 do të vriten nga patologjitë që rrjedhin nga duhani